搵女朋友一定要搵會去露營嘅

睇完呢篇講「找男朋友一定要找會露營的男孩」,對一個深資露營仔黎講,其實一個會去露營嘅女仔都可遇不可求。

間中脫離一下消費主義

去郊外,除咗交通費同為咗食好啲嘅食物錢,往往都唔使點使錢。 係大自然行下山、影下相、望下星、煮下野食,其實都係一啲可以有深入交流嘅活動。

成日都話「quality of time」比「quantity of time」重要好多。所以就算一個月去一次露營,經歷嘅分分鐘比會每個禮拜去逛商場嘅多。

Minimalist 生活態度

冇咗屋企嘅電飯煲、暖水爐、軟綿綿嘅床墊,甚至係一開就有嘅自來水(有時係要自己打水),會發覺其實生活其實並唔需要好多奢侈嘅野。一個能夠同你一齊過呢種簡單生活嘅女仔,一啲都唔簡單。

生活能力超強

要自己煮三餐、自己起天幕、自己搵路入營地其實唔易。而且除咗適應力之外,事前要花嘅預備心機亦都唔少。例如預備早午晚餐嘅食材、記得帶照明用品等等,心思唔慎密少少都好易出事。去得露營多,積累嘅會係生活中嘅應該常識。現今世代,「常識」有時已經變咗超能力。

分甘共苦

人在野外,難免會遇到唔少頗驚險嘅情況。雖然未至於會係比熊仁追殺,但小至被野牛圍攻,大至遇上山火,都有可能發生。面對呢類難題,首要條件係唔會嫌三嫌四,甚至發晒脾氣﹔如果能夠一齊落手落腳解決,實屬難得。同甘共苦過後,呢啲點滴都會留係兩個人難忘嘅回憶當中,化成感情嘅養分。

享受寧靜的樂趣

最終,搞咁多野,其實都係想遠離煩囂,跳入另一個天地,享受大自然帶來嘅平靜。輕輕鬆鬆煮下晚餐、認下星座影下星、甚至只係花一晚談天說地,如果你身邊有一個可以同你分享呢個時光嘅人,就記得要珍而重之喇 :)


最後

最後,其實呢篇都係Content marketing 黎嘅。

個product 就係我自己... 嘅一個朋友...
附上其另外一個重大優點(誤

跪求分享,如有興趣請PM (誤

comments powered by Disqus